வெற்றி நடிப்பில் வெளியாகியுள்ள ‘பிளாக் கோல்டு’ திரைப்படம், நாம் அதிகம் அறிந்திராத தலைமுடி வணிகத்தின் பின்னணியில் இயங்கும் மிகப்பெரிய மாஃபியா உலகத்தை வித்தியாசமான கதைக்களத்தில் அறிமுகப்படுத்துகிறது. தலைமுடி எப்படி சர்வதேச அளவில் கருப்புத் தங்கமாகப் பார்க்கப்படுகிறது, அதன் பின்னணியில் இருக்கும் வணிகம் மற்றும் குற்றச்செயல்கள் என்ன என்பதையும் ஒரு கிரைம் த்ரில்லர் பாணியில் சொல்லியிருக்கிறார் இயக்குநர்.
ஒரு கொலைச் சம்பவத்தில் ஈடுபடும் மூன்று பேர், அண்டர்கிரவுண்ட் கேங்கில் இயங்கும் இரண்டு பேர், ஒரு அழகான குடும்பம் எனப் பல்வேறு கதாபாத்திரங்களின் பார்வையில் கதை நகர்கிறது. இப்படி வெவ்வேறு கோணங்களில் கதையைச் சொல்லியிருப்பதும், ஒவ்வொரு கதாபாத்திரத்திற்கும் தனித்துவமான பின்னணியை உருவாக்கியிருப்பதும் படத்தின் பலம். குறிப்பாக, ‘நான் மகான் அல்ல’, ‘பொல்லாதவன்’ போன்ற திரைப்படங்களின் சாயலில் ஒரு சுவாரஸ்யமான கிரைம் த்ரில்லராக உருவாகும் வாய்ப்பு இந்தக் கதைக்கு இருக்கிறது.
வெற்றி தனது கதாபாத்திரத்தை உணர்ந்து சிறப்பாக நடித்திருக்கிறார். குறிப்பாக, தந்தையைத் தேடிச் செல்லும் காட்சிகளில் அவரது நடிப்பு நன்றாக இருக்கிறது. அபிராமி வெங்கடாசலம் காவல்துறை ஆய்வாளராக கம்பீரமான தோற்றத்திலும், மிடுக்கான நடிப்பிலும் கவனம் ஈர்க்கிறார். வில்லன் கதாபாத்திரங்களில் நடித்திருப்பவர்களும் தங்களது பங்களிப்பைச் சிறப்பாகச் செய்திருக்கிறார்கள். ஒட்டுமொத்த நடிகர்களின் நடிப்பும் படத்திற்கு பலம் சேர்க்கிறது.
அதேநேரத்தில், நான்கைந்து வெவ்வேறு கதைகளைச் சொல்லும் முயற்சியில் திரைக்கதையின் வேகம் சற்று குறைகிறது. இடைவேளை வரை பெரிய அளவில் சுவாரஸ்யம் இல்லாமல் நகரும் படம், இடைவேளைக்குப் பிறகுதான் முக்கியமான கதைக்குள் நுழைகிறது. அதன்பிறகு வரும் விசாரணை மற்றும் தேடல் காட்சிகளிலும் இன்னும் கொஞ்சம் விறுவிறுப்பைக் கூட்டியிருக்கலாம். நாயகிக்கான கதாபாத்திரமும் பெரிய அளவில் பயன்படுத்தப்படவில்லை.
வித்தியாசமான கதைக்களம், சிறப்பாக வடிவமைக்கப்பட்ட கதாபாத்திரங்கள், அனைவரின் இயல்பான நடிப்பு எனப் பல நல்ல அம்சங்களைக் கொண்டிருக்கிறது ‘பிளாக் கோல்டு’. திரைக்கதையில் இன்னும் கொஞ்சம் சுவாரஸ்யத்தையும் பரபரப்பையும் சேர்த்திருந்தால், ஒரு சிறந்த கிரைம் த்ரில்லர் அனுபவத்தைக் கொடுத்திருக்கும்.
