இளையராஜா இசையில் உருவாகி, சர்வதேசத் திரைப்பட விழாக்களில் கவனம் ஈர்த்த மராத்தியத் திரைப்படம் ‘கோந்தல்’. தற்போது தமிழில் டப்பிங் செய்யப்பட்டு வெளியாகியிருக்கும் இப்படத்தை அறிமுக இயக்குநர் சந்தோஷ் தவாகர் இயக்கியிருக்கிறார். மராத்திய மண்ணின் பாரம்பரியச் சடங்கையும் கலாசாரத்தையும் மையமாகக் கொண்டு உருவாகியிருக்கும் திரைப்படம் இது.
ஒரே இரவில் நடைபெறும் திருமணமும் அதைச் சுற்றி நடக்கும் பாரம்பரியச் சடங்குகளும்தான் படத்தின் கதைக்களம். காதல், ஆசை, துரோகம், பழிவாங்குதல் என மனிதர்களின் பல்வேறு உணர்வுகளை அந்த ஒரு இரவுக்குள் அழுத்தமாகப் பதிவு செய்திருக்கிறார் இயக்குநர்.
படத்தின் மிகப்பெரிய பலமே அதன் மேக்கிங். குறிப்பாக ஆரம்பத்தில் வரும் 25 நிமிட ஒற்றை ஷாட் காட்சி வியக்க வைக்கிறது. ஒரு பெரியவர் நடந்து செல்வதில் தொடங்கி, திருமண வீட்டையும் அங்குள்ள கதாபாத்திரங்களையும் அறிமுகப்படுத்தும் விதம் அட்டகாசம். நடிகர்கள் அனைவரும் மிக இயல்பான நடிப்பை வெளிப்படுத்தியிருக்கிறார்கள்.
ஒளிப்பதிவு படத்திற்கு மிகப்பெரிய பலம். இரவு முழுவதும் நடைபெறும் கூத்து நிகழ்ச்சியும், கிராமத்து மனிதர்களின் வாழ்க்கை முறையும் மிக அழகாகப் படமாக்கப்பட்டுள்ளன. இளையராஜாவைப் பொறுத்தவரை பல இடங்களில் இசையைவிட மௌனத்திற்கே முக்கியத்துவம் கொடுத்து காட்சிகளின் உணர்வுகளை அழுத்தமாகக் கடத்தியிருக்கிறார்.
ஆரம்பத்தில் மெதுவாக நகர்ந்தாலும், கதைக்குள் சென்ற பிறகு பார்வையாளர்களை முழுமையாக ஈர்க்கிறது. ஒரு சிறுகதையையோ நாவலையோ வாசித்த அனுபவத்தைத் தரும் சிறந்த இலக்கியப் படைப்பு. வழக்கமான கமர்ஷியல் சினிமாவைத் தாண்டி நல்ல சினிமாவை விரும்புபவர்கள் நிச்சயம் பார்க்க வேண்டிய திரைப்படம் ‘கோந்தல்’.
