இயக்குநர் – அமீன் பரிப்
நடிகர்கள் – சுபாஷ் செல்வம், முனிஷ்காந்த், ராஜேஷ் மாதவன், கௌதமி
இசை – விபின் பாஸ்கர் மற்றும் சேவியர்
தயாரிப்பு – ரைஸ் ஈஸ்ட் என்டர்டெயின்ட் – ஶ்ரீநிதி சாகர்
துணைச் சிறைச்சாலை கண்காணிப்பாளராக இருக்கும் ஒருவர், குற்றவாளிகளை திருத்துவது தான் சிறைச்சாலையின் பணி என்பதை நம்புகிறார். எனவே, சிறைச்சாலையில் சிறிய அளவிலான நூலகம் ஒன்றை உருவாக்கி , சிறை கைதிகளிடம் தான் எழுதிய புத்தகத்தை கொடுத்து படிக்க சொல்வதோடு, குற்ற சம்பவங்களுக்கான தீர்வுகளையும் தான் படிக்கும் புத்தகத்திலேயே தேடுகிறார். அவருடன் ஒரு காவலர் பணியாற்றுகிறார் , இந்நிலையில் சிறைச்சாலையில் இருக்கும் கோவில் உண்டியலில் இருக்கும் பணம் திருடப்படுகிறது. சிறைச்சாலையில் கொள்ளையடிக்கப்பட்ட சம்பவம் வெளியே தெரிவதற்கு முன்பு பணத்தை இருக்கும் இடத்தில் வைத்தாக வேண்டிய கட்டாயத்திற்கு காவலர்கள் தள்ளப்படுகிறார். இதனால், வங்கியில் கடன் பெற்று அந்த பணத்தை கோவில் உண்டியலில் போட முடிவு செய்கிறார். அதன்படி கடன் பெற்று அந்த பணத்தை தன் வீட்டில் வைத்திருக்க, அங்கேயும் உண்டியல் திருடன் கைவரிசை காட்டுகிறார். இதற்கெல்லாம் யார் காரணம் அந்த பணம் என்ன ஆனது என்பதை சஸ்பென்ஷ் கலந்து சொல்வதே இந்த ‘காக்கி சர்க்கஸ்’. தொடர்.
இந்த தொடரில் சிறை கண்காணிப்பாளர் முனீஷ்காந்த், காவலர் சுபாஷ் செல்வம், திருடன் ராஜேஷ் மாதவன் ஆகிய மூன்று கதாபாத்திரங்கள் முக்கிய பணி ஆற்றியுள்ளது, மூவரும் வெவ்வேறு சுபாவம் கொண்ட கதாபாத்திரங்களாக நடித்துள்ளனர், கதையின் நாயகர்களாக நடித்திருக்கும் முனீஷ்காந்த் மற்றும் சுபாஷ் செல்வம் இரண்டு பேரும் தங்களது கதாபாத்திரங்களுக்கு நியாயம் சேர்க்கும்படி நடித்திருக்கிறார்கள்.
முனீஷ்காந்த், வழக்கமான தன் உடல்மொழி மற்றும் நகைச்சுவை பாணியை தவிர்த்துவிட்டு, கதாபாத்திரத்திற்கு எது தேவையோ அதை மட்டுமே வெளிப்படுத்தியிருப்பது அந்த கதாபாத்திரத்திற்கு பலம் சேர்த்திருப்பதோடு, ஒரு நடிகராக தன்னை வித்தியாசப்படுத்தி காட்டியிருக்கிறார். சிறை காவலராக நடித்திருக்கும் சுபாஷ் செல்வம், கதாபாத்திரத்தில் கச்சிதமாக பொறுந்தியிருப்பவர் காமெடி பாணி என்றாலும், தனது அசத்தலான ஆக்ஷன் காட்சிகள் மூலம் மிரட்டியிருக்கிறார். திருடனை பிடிக்கும் காட்சிகள் நகைச்சுவையாக பயணித்தாலும், சுபாஷின் வேகம் மற்றும் படபடப்பு நகைச்சுவையை தாண்டி, ஆக்ஷன் த்ரில்லர் உணர்வை கொடுக்கிறது.
திருடராக நடித்திருக்கும் ராஜேஷ் மாதவன், மிக எளிமையான மனிதராக வலம் வந்தாலும், பணத்திற்காக அல்லாமல் பெயருக்காக திருடுவதும், அதில் இருந்து தப்பிப்பதும் தொடரின் சுவாரஸ்யத்தை அதிகப்படுத்துகிறது. கதாநாயகிகளாக நடித்திருக்கும் வின்சு ஷாம் மற்றும் கெளதமி ஆகியோர் தங்களது வேலையை குறையின்றி செய்திருக்கிறார்கள். சாவித்ரி, அம்ருதா, அப்துல் லீ, மருதுபாண்டியன், ராகேஷ், உசர், விக்னேஷ்வர், அருண்குமார் உள்ளிட்ட தொடரில் நடித்திருக்கும் அனைத்து நடிகர்களும் கதாபாத்திரங்களுக்கு பொறுத்தமான தேர்வாக பயணித்து பலம் சேர்த்திருக்கிறார்கள்.
ஒளிப்பதிவாளர் நீரஜ் ரவி தேவையான ஒளிப்பதிவை கொடுத்துள்ளார், அதே போல் இசையமைப்பாளர் சேவியர் மற்றும் விபின் பாஸ்கர் பின்னணி இசையை சிறப்பாக கொடுத்துள்ளனர், திரைக்கதையின் ஓட்டத்திற்கு பலம் சேர்த்துள்ளது,
ஒரு எளிமையான கருவுக்கு பல கிளைக்கதைகளுடன் திரைக்கதை அமைத்திருக்கும் இயக்குநர் அமீன் பாரிப், கோவில் உண்டியலையும் ஒரு கதாபாத்திரமாக வடிவமைத்து, அதற்கான பின்னணி கதையோடு ஒவ்வொரு அத்தியாயத்தையும் மிக சுவாரஸ்யமாக நகர்த்திச் செல்கிறார். பதில் கிடைக்காத பல கேள்விகளை நாம் முன் வைத்து அதற்கு ஒன்றன் பின் ஒன்றாக பதில் அளிப்பது இன்னும் சுவாரஸ்யம்.
மொத்தத்தில், ‘காக்கி சர்க்கஸ்’ நகைச்சுவை கலந்த ஒரு விறுவிறுப்பு தொடர்.
