இயக்கம் – பி.வி.நந்தினி ரெட்டி
நடிகர்கள் – சமந்தா, திகந்த் மஞ்சாலே, கெளதமி, ஆனந்த். குல்ஷன் தேவய்யா
இசை – சந்தோஷ் நாராயணன்
தயாரிப்பு – டிராலாலா மூவிங் பிக்சர்ஸ்
காதலித்து திருமணம் செய்து கொண்ட ஒரு பெண், தன்னால் பிரிந்த தன் கணவர் குடும்பத்தை சமாதானப்படுத்துவதற்காக அவருடன் ஊருக்கு வருகிறார். கட்டுப்பாடு மிக்க அந்த குடும்ப நபர்களை கவர்வதற்காக தனக்கு தெரியாத பல்வேறு விசயங்களை செய்து நல்ல பெயர் வாங்க முயற்சிக்கிறார். இதற்கிடையே, சிறையில் தண்டனை அனுபவிக்கும் கொலை குற்றவாளி ஒருவன் தப்பித்து இந்த பெண்ணை தேடி வருகிறார். அந்த பெண்ணை தன்னுடன் அழைத்துச் செல்ல முயற்சிக்கும் அவர், அதற்கு சம்மதிக்கவில்லை என்றால், மொத்த குடும்பத்தையும் அழித்து விடுவதாக மிரட்டுகிறார். தன் கணவர் குடும்பத்தை ஆபத்தில் இருந்து காக்கும் பணியில் ஈடுபடும் அந்த பெண், அதில் வெற்றி பெற்றாரா?,இதன் பின்னணி என்ன ? என்பதை காமெடி கலந்த ஆக்ஷனோடு சொல்வது தான் இந்த ‘எங்கள் தங்கம்’ படத்தின் கதை.
இந்தப் படத்தில் முதலில் அமைதியாக அறிமுகமாகும் சமந்தா, தன்னையும், தன் கணவர் குடும்பத்தையும் தாக்க வருபவர்களை எதிர்த்து நிற்கும் காட்சிகளில் புயலாக மாறி ஆக்ஷனில் அசத்துகிறார். தன் அழகான சிரிப்பு மற்றும் குறும்புத்தனமான நடிப்பு ஆகியவற்றை கடந்து ஆண்மைத்தனம் மிக்க நடை மற்றும் உடல்மொழி மூலம் மிரட்டுகிறார். குறிப்பாக, ஆக்ஷன் மற்றும் துப்பாக்கி சூடு காட்சிகளை பார்வையாளர்கள் வியக்கும் விதத்தில் கையாண்டிருக்கும் சமந்தா, புடவை கட்டிய பூலான்தேவியாக வலம் வந்து படத்திற்கு பெரும் பலம் சேர்த்திருக்கிறார்.
அதே போல சமந்தாவின் கணவராக நடித்திருக்கும் திகந்த் மஞ்சாலே, மாமியாராக நடித்திருக்கும் கெளதமி, மாமனராக நடித்திருக்கும் ஆனந்த், பாட்டியாக நடித்திருக்கும் ஸ்ரீ லக்ஷ்மி, தோழியாக நடித்திருக்கும் மன்ஜூஷா, கொழுந்தனாக நடித்திருக்கும் சைதன்ய கிருஷ்ணா, கணவரின் தம்பி மனைவியாக நடித்திருக்கும் ஸ்ரீமுகி, கணவரின் தங்கையாக நடித்திருக்கும் நடிக என அனைத்து நடிகர், நடிகைகளும் தங்களது பணியை சரியாக செய்திருக்கிறார்கள்.வில்லனாக நடித்திருக்கும் குல்ஷன் தேவய்யா, பெரிய அளவில் மிரட்டவில்லை என்றாலும், சமந்தா யார் ? என்ற உண்மையை வெளிக்கொண்டு வரும் கதாபாத்திரத்தில் கச்சிதமாக நடித்து திரைக்கதை பயணத்திற்கு பலம் சேர்த்திருக்கிறார்.
இந்தப் படத்திற்கு சந்தோஷ் நாராயணன் இசையமைத்துள்ளார், அவரது இசையில் பாடல்கள் கொண்டாட்ட மனநிலையை கொடுக்கிறது. பின்னணி இசை ஆக்ஷன் காட்சிகள் மற்றும் மாஸ் காட்சிகளுக்கு கூடுதல் பலம் சேர்க்கும் வகையில் பயணித்திருக்கிறது.ஓம் பிரகாஷின் ஒளிப்பதிவில் ஆக்ஷன் காட்சிகள் ரசிக்கும்படி இருக்கிறது. சமந்தாவின் கோபமான முகத்தையும், மாஸான நடிப்பையும் சரியான அளவில் பார்வையாளர்களிடம் கடத்தி ரசிக்க வைத்திருக்கிறார்.
இந்தப் படம் சாதாரண ஆக்ஷன் கமர்ஷியல் மாஸ் கதை தான் என்றாலும், அதை குடும்பத்துடன் பார்க்கும்படியான மற்றும் பெண்களுக்கு பிடிக்கும் வகையிலான ஒரு கதையாக கதையாசிரியர்கள் ராஜ் நிடிமொரு, வசந்த் மரிம்கண்டி கொடுத்திருக்கிறார்கள். இவர்களது கதைக்கு திரைக்கதை அமைத்திருக்கும் ராஜ் நிடிமொரு, பரபரப்பான காட்சிகள் மூலம் படத்திற்கு கூடுதல் பலம் சேர்த்திருக்கிறார். சமந்தா ஏற்கனவே பல படங்களில் ஆக்ஷனில் மிரட்டியிருந்தாலும், இதில் அவரை வேறு ஒரு பரிணாமத்தில் ஆக்ஷன் நாயகியாக கொண்டாட வைத்திருக்கிறார் இயக்குநர் பி.வி.நந்தினி ரெட்டி.
படத்தில் சிறந்த மருமகளாக வேண்டும் என்பதற்காக சமந்தா செய்யும் குறும்புத்தனமான மோசடிகள் மற்றும் மருமகள்களுக்கு இடையே நிலவும் போட்டிகள் ஆகியவற்றின் மூலம் படத்தின் முதல் பாதியை கலகலப்பாக நகர்த்தி செல்லும் இயக்குநர் பி.வி.நந்தினி ரெட்டி, இரண்டாம் பாதியில் கலகலப்பை கலரவமாக மாற்றினாலும், அங்கேயும் குடும்பத்தாரை இணைத்து ஒரு முழுமையான குடும்ப ஆக்ஷன் பொழுதுபோக்கு படமாக கொடுத்து பார்வையாளர்களை திருப்திப்படுத்தி விடுகிறார். அதற்கு நிச்சயம் பாராட்டுக்கள்.
மொத்தத்தில், ‘எங்கள் தங்கம்’ கண்டிப்பாக அனைவரையும் கவரும்.
