இயக்குநர் – விஜய்
நடிகர்கள் – மதும்கேஷ், ஜியா ஷங்கர், அர்ஜுன் அசோகன், எம் எஸ் பாஸ்கர்
இசை – ஹாரிஸ் ஜெயராஜ்
தயாரிப்பு – டி ஸ்டூடியோ & மாலி மற்றும் மான்வி மூவி மேக்கர்ஸ்
ஒரு பெண்ணை ஒருவர் ஒருதலையாக காதலிக்கிறார் , அவரது நண்பர் இன்னொருவரை காதலிக்கிறார். இதற்கிடையே அவன் மரதியால் பாதிக்கப்படுகிறார். தூங்கி எழுந்தால் முந்தைய நாளில் நடந்த அனைத்தையும் மறந்து விடும் நிலைக்கு சென்று விடுகிறார். இதனால் தான் யார் ? என்று தெரியாமல் ஒவ்வொரு நாளும் தவிக்கும் அவரிடம், காதலனாக அறிமுகமாகி பயணிக்க தொடங்குகிறார் ஒருவர். அவரது இந்த பொய், நாயகனின் வாழ்க்கையில் எத்தகைய மாற்றங்களை ஏற்படுத்துகிறது, என்பதை முக்கோண காதல் கதையாக சொல்வதே இந்த ‘காதல் ரீசெட் ரிப்பீட்’.
என்னதான் தன் மனதில் காதல் இருந்தாலும், அதை வெளிக்காட்டாமல் ஏக்கத்தோடு பயணிக்கும் கதாபாத்திரத்திற்கு கச்சிதமாக பொருந்தியிருக்கிறார் நாயகன் மதும்கேஷ். இறுக்கமான முகம், நடவடிக்கைகளில் பொறுமை என்று தனியாக தெரியும் குணாதிசயங்கள் கொண்ட கதாபாத்திரத்தை மிக கச்சிதமாக கையாண்டு கவனம் ஈர்க்கிறார். அதே போல் நாயகியாக நடித்திருக்கும் அறிமுக நடிகை ஜியா சங்கர், பார்வையாளர்களை கவர்ந்து விடுகிறார். கதாநாயகிக்கு முக்கியத்துவம் உள்ள காதல் கதை என்பதால் அவருக்கு அதிகமான வாய்ப்பு கிடைத்திருக்கிறது. அனைத்து வாய்ப்புகளையும் சரியாக பயன்படுத்தி பார்வையாளர்கள் மனதில் எளிதில் இடம் பிடித்து விடுகிறார்.
முக்கியமான கதாபாத்திரத்தில் நடித்திருக்கும் அர்ஜுன் அசோகன், தன் பணியை சிறப்பாக செய்திருக்கிறார். சிறிய வேடம் என்றாலும் விஜி சந்திரசேகர், ஜெயப்பிரகாஷ், எம்.எஸ்.பாஸ்கர் ஆகியோரது அனுபவம் வாய்ந்த நடிப்பு மற்றும் திரை இருப்பு படத்திற்கு பலம் சேர்த்திருக்கிறது.
இந்தப் படத்திற்கு ஹரிஷ் ஜெயராஜ் இசையந்துள்ளார், அவருக்கே உரித்தான இசையின் தரம் இந்தப் படத்திற்கும் சிறப்பாக இருக்கிறது. இந்தப் படத்திற்கு ஒளிப்பதிவாளர் அரவிந்த்கிருஷ்ணா ஒளிப்பதிவு செய்துள்ளார். படம் முழுவதும் வெளிநாட்டில் நடப்பதால், அழகான இடங்களை தேடிப்பிடித்து காட்சிகளை படமாக்கியிருக்கிறார்கள். எங்கு கேமரா வைத்தாலும், பசுமையும், பழமையும் நிறைந்த இடங்களாக இருப்பதால் கண்களுக்கு விருந்தாக காட்சிகள் அமைந்தது.
ஒரு முக்கோண காதல் கதையை புதிய வடிவில் கொடுக்க முயற்சித்து அதில் வெற்றியும் பெற்றுள்ளார் இயக்குநர் விஜய், எளிமையான காட்சிகளை திரைக்கதையின் முக்கியத்துவ காட்சிகளாக வைத்துக் கொண்டு படத்தை நகர்த்தியிருக்கிறார். ஒரு நல்ல தேர்ந்த இயக்குநரின் படைப்பை போல இந்தப்படம் இருந்தது. அவருக்கு வாழ்த்துக்கள்.
மொத்தத்தில், ‘காதல் ரீசெட் ரிப்பீட்’ ஒரு வித்தியாசமான காதல் அனுபவம்.
